Президентнинг "Наманган ва Андижон вилоятларида тўқимачилик ва тикув-трикотаж саноатига ихтисослаштирилган эркин иқтисодий зоналар ташкил этиш чора-тадбирлари тўғрисида"ги Фармони лойиҳаси эълон қилинди.
Ўзбекистон Республикаси Инвестициялар ва ташқи савдо вазирлиги, Наманган ва Андижон вилоятлари ҳокимликларининг Наманган вилоятининг Наманган шаҳри, Тўрақўрғон ва Чортоқ туманларидаги жами, 313,7 гектар ер майдонида “Namangan-textile” эркин иқтисодий зонаси ва Андижон вилоятининг Пахтаобод туманидаги 55 гектар ер майдонида “Andijan-textile” эркин иқтисодий зоналари ташкил этиш ҳамда уларнинг ҳудудий чегараларини тасдиқлаш таклифи маъқулланади.
Қуйидагилар “Namangan-textile” ва “Andijon-textile” эркин иқтисодий зоналарининг асосий вазифалари ва фаолият йўналишлари этиб белгиланади:
тўқимачилик саноатининг иқтисодиётдаги улушини ошириш, мамлакатда ишлаб чиқарилаётган тўқимачилик маҳсулотларининг, энг аввало, юқори қўшилган қийматли рақобатбардош тўқимачилик маҳсулотларини юқори технологик ишлаб чиқаришга қайта йўналтириш орқали ҳажми ва сифатини ошириш;
ташқи бозорларда талаб катта бўлган ва импорт ўрнини босувчи, юқори қўшилган қийматли газлама маҳсулотларини ишлаб чиқариш бўйича замонавий ишлаб чиқаришларни ташкил этиш учун хорижий ва маҳаллий инвесторларнинг тўғридан-тўғри инвестицияларини жалб этиш;
мавжуд хом ашё ва материалларни етиштиришдан бошлаб, унга дастлабки ишлов бериш, маҳсулотларни қайта ишлаш ва юқори қўшилган қийматли тайёр тўқимачилик маҳсулоти чиқариш босқичигача бўлган ишлаб чиқариш интеграциясини назарда тутувчи ривожланишнинг кластер моделини амалга ошириш;
тармоқ корхоналарининг логистика ва муҳандислик инфратузилмасини ривожлантириш билан ўзаро узвий боғлиқликда, шу жумладан кўп функцияли транспорт-логистика хабларини қуриш, юкларни етказишнинг оптимал йўналишлари ҳамда йўлакларини танлаш, шунингдек, транспортда юк ташиш тарифларини оптималлаштириш орқали ривожлантиришни таъминлаш;
юқори сифатли тайёр тўқимачилик маҳсулотларини ишлаб чиқариш ва экспортини кенгайтириш, миллий брендларни жаҳон бозорларига олиб чиқиш мақсадида ишлаб чиқариш жараёнига илғор инновацион технологиялар, ноу-хау, дизайнерлик ишланмаларини кенг жорий этиш, фурнитура ва аксессуарларнинг замонавий намуналарини ишлаб чиқаришни маҳаллийлаштириш;
тўқимачилик ва тикув-трикотаж маҳсулотларини экспорт географиясини янада кенгайтириш ва жаҳон бозорларини босқичма-босқич эгаллаш ҳамда халқаро рейтингларда Ўзбекистоннинг тўқимачилик ва тикув-трикотаж маҳсулотларини ишлаб чиқариш даражасини ошириш.
Шунингдек, “Namangan-textile” ва “Andijon-textile” эркин иқтисодий зоналарининг инвестицион жозибадорлигини ошириш ва маҳсулот таннархини пасайтириш мақсадида Давлат хусусий шерикчилик асосида ер майдонларида қуйидаги фаолиятларни ташкил этиш назарда тутилади:
тўқимачилик, тайёр тикув ва трикотаж маҳсулотларини, ҳамда уларни ишлаб чиқариш учун талаб этиладиган хом ашё, ярим тайёр маҳсулотлар, фурнитура ва аксессуарлар, бўёқ ва кимёвий моддалар, технологик ускуналар ва уларнинг эҳтиёт қисмлари улгуржи ва чакана савдоси;
омбор, cargo-service (халқаро юк ташиш) ва юк автоуловлари учун тўхтаб туриш (паркинг), бирламчи тиббий ёрдам хизматлари, меҳмонхона, банк, солиқ ва бошқа хизматлар турлари;
экспорт-импорт юкларини божхона расмийлаштируви, шунингдек уларни сифатини синовдан ўтказиш лабораториялари фаолиятини ташкил этиш ҳамда карантин ва мувофиқлик сертификатларини расмийлаштириш;
ҳар йили камида икки марта (баҳор ва куз фаслларида) “Шоппинг фестивал” халқаро оммавий кўргазма-савдо тадбирларини ўтказиш ва бошқалар.
Меҳмонхона, озиқ-овқат, бирламчи тиббий ёрдам ва йўловчиларни ташиш хизматларидан ташқари бошқа хизмат турлари “Ягона дарча” интерактив услубида ташкил этилади.
Белгилаб қўйилишича:
“Namangan-textile” ва “Andijon-textile” эркин иқтисодий зоналарнинг фаолият кўрсатиш муддати, кейинчалик узайтириш имконияти билан 30 йилни ташкил қилади;
“Namangan-textile” ва “Andijon-textile” эркин иқтисодий зоналар дирекциялари эркин иқтисодий зоналарнинг бутун фаолият кўрсатиши даврида солиқлар ва давлат мақсадли жамғармаларига мажбурий ажратмалар тўлашдан озод этилади.
“Ўзтўқимачиликсаноат” уюшмаси, Наманган ва Андижон вилоятлари ҳокимликлари Ўзбекистон Республикаси Инвестициялар ва ташқи савдо вазирлиги билан биргаликда икки ой муддатда “Namangan-textile” ва “Andijon-textile” эркин иқтисодий зоналари ҳудудларида 2020-2022 йилларда тўқимачилик брендини яратиш мақсадида, импорт ўрнини босувчи ва экспортга йўналтирилган тўқимачилик ва тикув-трикотаж маҳсулотлари, фурнитура ва аксессуарлар, бўёқ ва кимёвий моддалар, технологик ускуналар ҳамда уларнинг эҳтиёт қисмлари ва бошқа маҳсулотлар ишлаб чиқариш корхоналарини жойлаштириш бўйича инвестиция лойиҳалари рўйхатини шакллантиради ва белгиланган тартибда тасдиқлаш учун махсус иқтисодий ва кичик саноат зоналар Маъмурий кенгашига киритади.
Кўрсатиб ўтилишича, “Namangan-textile” эркин иқтисодий зонаси ҳудудида ажратиладиган ер майдонларида юқори қўшилган қийматга эга янги инвестиция лойиҳаларини ҳамда бошқа инфратузилма объектларини жойлаштириш қуйидаги босқичларда амалга оширилади:
1-босқич – Наманган вилояти Наманган шаҳрининг Қўқумбой, Самарқанд ва Ижодкор массивларидаги жами 113,2 га ер майдонида;
2-босқич – Наманган вилояти Тўрақўрғон туманининг Ғайрат ҳамда Чортоқ туманининг Мучум массивларидаги жами 200,5 га ер майдонида.