“Aloqa Bank” boshqaruvi raisi K.Irisbekova hamda “O‘zto‘qimachiliksanoat” uyushmasi raisi M.Sultonovning tashabbusi bilan  Xitoyning yetakchi ishlab chiqaruvchilaridan biri — "Comoda Garments Limited"  kompaniyasi rahbari janob Steven Zhang  boshchiligidagi delegatsiya Namanganga taklif etildi.

Xorijiy investorlarga Namangan erkin iqtisodiy zonasining infratuzilmasi, mavjud soliq va bojxona imtiyozlari, eksportga yo‘naltirilgan ishlab chiqarish uchun yaratilgan sharoitlar haqida batafsil taqdimot o‘tkazildi. Muloqotlar davomida tomonlar o‘zaro manfaatli hamkorlik doirasida yangi to‘qimachilik majmuasi qurilishi, minglab ish o‘rinlari yaratilishi, mahsulotlarning dunyo bozorlariga yetkazilishi va eng muhimi — xalqaro miqyosda tan olinadigan brend aynan Namanganda shakllantirilishi borasida kelishuvga erishdilar.

Loyiha yakuniga yetkazilgach, u nafaqat O‘zbekiston, balki Markaziy Osiyodagi eng yirik to‘qimachilik kompaniyalaridan  biriga aylanadi . Bu esa Muhtaram Prezidentimiz tomonlaridan  olib borilayotgan ochiq va samarali investitsiya siyosatining yana bir amaliy ifodasi bo‘ladi.