“Namangan” EIZ xududida investitsiya loyixasini amalga oshirish uchun imtiyozlar

“Namangan” EIZ xududida investitsiya loyixasini amalga oshirish uchun Direksiya tomonidan taklif etilayotgan investitsiya loyihasi o‘rganilib, loyihani “Namangan” EIZ hududiga joylashtirishga oid ijobiy xulosasi berilishi lozim.

Korxonaning investitsion buyurtnomasi Namangan EIZ tomonidan maʼqullanganidan so‘ng, O‘zbekiston Respublikasi Prezidentining 2018 yil 21 dekabrdagi “Erkin iqtisodiy zonalar faoliyatini muvofiqlashtirish va boshqarish tizimini yana-da takomillashtirish chora-tadbirlari to‘g‘risida”gi PF–5600-sonli Farmoniga asosan loyiha uchun kerakli yer maydoni onlayn auksion orqali ijaraga beriladi.

Bunda, yer uchastkasini elektron onlayn-auksionga chiqarishdagi boshlang‘ich narx hamda har yilgi ijara to‘lovi miqdori maʼmuriy kengash qarori bilan belgilanadi. (yer maydonining boshlang‘ich narhi va ijara to‘lovi O‘zbekiston Respublikasi Soliq kodeksining 429-moddasida Namangan viloyati uchun ko‘rsatilgan stavkadan kam bo‘lmagan miqdorda belgilanadi.)

Ijara muddati auksionda g‘olib deb topilgan korxona bilan O‘zbekiston Respublikasi Yer kodeksining 24-moddasida ko‘rsatilgan muddatlarga tuziladi.

O‘zbekiston Respublikasi Prezidentining 2016 yil 26 oktyabrdagi “Erkin iqtisodiy zonalar faoliyatini faollashtirish va kengaytirishga doir qo‘shimcha chora-tadbirlar to‘g‘risida” PF-4853-sonli Farmonining 3-bandida “Maxsus iqtisodiy zonalar ishtirokchilariga O‘zbekiston Respublikasi Soliq kodeksi va O‘zbekiston Respublikasining «Maxsus iqtisodiy zonalar to‘g‘risida»gi Qonunida belgilangan tartibda alohida soliqlar, shuningdek, bojxona to‘lovlari bo‘yicha imtiyozlarni qo‘llashning o‘ziga xos xususiyatlari nazarda tutiladi” deb ko‘rsatilgan.

Farmonning 4-bandida esa:

300 ming AQSH dollaridan 3 million AQSH dollarigacha hajmdagi investitsiyalar - 3 yil;

3 million AQSH dollaridan 5 million AQSH dollarigacha hajmdagi investitsiyalar - 5 yil;

5 million AQSH dollaridan 10 million AQSH dollarigacha hajmdagi investitsiyalar - 7 yil;

10 million AQSH dollari va undan yuqori - 10 yil muddatga Farmonning 3-bandida ko‘zda tutilgan imtiyozlar qo‘llanilishi belgilangan.

Shuningdek, O‘zbekiston Respublikasi Soliq kodeksining
473-moddasida Maxsus iqtisodiy zonalarning ishtirokchilariga kiritilgan investitsiyalar hajmiga qarab, mol-mulk solig‘idan, yer solig‘idan va suv resurslaridan foydalanganlik uchun soliqdan O‘zbekiston Respublikasi Prezidentining qarori bilan belgilangan muddatga ozod qilish tarzida soliq imtiyozlari berilishi ko‘rsatilgan.

Shu bilan birga, Ushbu Kodeks 473-moddasining birinchi qismida nazarda tutilgan soliq imtiyozlarining amal qilish muddati maxsus iqtisodiy zona ishtirokchisining guvohnomasi olingan kundan eʼtiboran hisoblanishi deb qatʼiy belgilangan.

Maxsus iqtisodiy zonalar ishtirokchilari quyidagilarni to‘lashdan ozod etiladi:

- respublikada ishlab chiqarilmaydigan va investitsiya bitimiga muvofiq investitsiya loyihasini amalga oshirish uchun qurilish davrida belgilangan tartibda olib kirilgan qurilish materiallari uchun bojxona to‘lovlarini (bundan qo‘shimcha qiymat solig‘i va bojxona rasmiylashtiruvi uchun yig‘imlar mustasno);

- tasdiqlangan ro‘yxat* bo‘yicha texnologik uskunalarning o‘xshashi O‘zbekiston Respublikasida ishlab chiqarilmaydiganini olib kirishda bojxona to‘lovlarini (bundan bojxona rasmiylashtiruvi uchun yig‘imlar mustasno).

(*O‘zbekiston Respublikasi hududiga olib kirishda import bojxona boji va qo‘shilgan qiymat solig‘idan ozod qilinadigan texnologik jihozlar Ro‘yxati 04.06.2021 yildagi №352-sonli qaror bilan tasdiqlangan)

Maxsus iqtisodiy zonalar ishtirokchilari tomonidan ishlab chiqarish va mahsulotlarni eksportga realizatsiya qilish uchun foydalanadigan xom ashyo, materiallar va butlovchi qismlar O‘zbekiston Respublikasi hududiga olib kirilganda bojxona to‘lovlari (bundan bojxona rasmiylashtiruvi uchun yig‘imlar mustasno) to‘lanmaydi.

Maxsus iqtisodiy zona ishtirokchilari tovarlarni import qilganda qo‘shilgan qiymat solig‘ini 120 kungacha muddatga kechiktirib to‘lashi mumkin.