25 декабрь куни “Наманган” эркин иқтисодий зонасида Хитой инвестициялари билан ташкил этилган "UFA Garments" МЧЖ хорижий корхонасининг тамал тоши қўйиш маросими бўлиб ўтди.
Бир йил аввал ишга туширилган “Наманган” эркин иқтисодий зонасининг ҳудуди бугун 681 гектарни ташкил этади, бугунги янги корхона билан бирга ҳисоблаганда умумий қиймати 550 миллион АҚШ долларидан ортиқ 15 та йирик лойиҳа амалга оширилаётганини мамнуният билан қайд этиш лозим.
10 гектарлик майдонда барпо этилаётган эркаклар устки кийимларини ишлаб чиқаришга ихтисослашган "UFA Garments" МЧЖ хорижий корхонасининг ишга туширилиши натижасида 2000 дан ортиқ иш ўринлари яратилади. 2020 йил 4-чорагида ишга туширилиши режалаштирилаётган ва умумий қиймати 11 миллион долларни ташкил этадиган ушбу корхонада йиллик 1,5 минг тонна тайёр кийим ишлаб чиқарилади.
Тўғридан тўғри Хитой инвестициялари билан ташкил этиладиган ушбу корхона маҳсулотларининг 70 фоизи Россия ва Европа бозорига экспорт қилиниши кўзда тутилган.
Хитойлик инвестор Фан Чен Сяо хоним ўз сўзида "UFA Garments" корхонаси 5 йил ичида Наманган вилоятининг энг йирик экспортерига айланишни режалаштираётганини қайд этиб, вилоятда мавжуд арзон хом-ашё ҳамда ёш ва малакали ишчи ресурслари билан Наманганда барпо этилаётган ушбу корхонанинг келажаги муваффақиятли бўлишига ишонч катта эканини таъкидлади.
